81 años... os máis guapos de Covas

Non hai idade para a beleza. Pénsao e sénteo así José Manuel Chaves cando cada ano organiza o concurso de miss e míster Covas. Esta vez, os elixidos foron Antonia Álvarez Lamelas e Ramón Rego Pérez, ambos de 81 anos, e que se foron felices e coa autoestima polas nubes ás súas casas. Xa teñen algo máis que contar aos seus netos, pero esta vez non son batallitas desas que correron nun pasado moi afastado, senón cousas que lles ocorreron hoxe, ou este domingo.

A cita prometía e fíxose xustiza. ás 17.00 horas, no centro social de Covas, arrincou o baile, que estivo amenizado polo Dúo Suso das Pontes, uns músicos que saben como facer mover as pernas dos maiores. Tras unha hora na pista, os avós descansaron para tomar un chocolate con bizcocho e, posteriormente, foron elixidos miss e míster Covas 2017. Pero tamén tiveron o seu oco de honra os máis simpáticos, que foron Manuel Gómez e María Josefa Fraga.

UNHAS 80 PERSOAS. A actividade reuniu a un total de 80 persoas, que se entregaron ao baile ata as 20.30 horas, sempre coa música de fondo do Dúo Suso.

E non só chegaron de Covas ou Viveiro. "Tamén viñeron de Cedeira, Xove ou Burela", dicía o organizador, que se mostraba moi satisfeito pola celebración do evento e pola boa acollida que tivo, non só na zona de Viveiro, senón noutros concellos próximos. "Pasárono en grande", comentaba.

Os trofeos para os máis guapos entre os maiores foron doados por Alfonso Otero Regal. Tamén contaron coa colaboración de Supermercados Covirán Os Castelos, que cedeu dúas cestas, cun xamón cada unha, que se sortearon entre os asistentes. Tamén colaborou o bar Amorne con cen botellas de auga.

Foi unha tarde diferente para os maiores, que bailaron, cantaron e falaron durante as máis de tres horas que durou o baile chocolatada que se celebrou nun centro social de Covas.