A sección quinta da Audiencia Provincial de Pontevedra ordenou a procura, detención e ingreso en prisión de Miguel B.R., un mariñeiro de Baiona (Pontevedra) que ía ser xulgado este mércores por un suposto delito de lesións, e que non se presentou á vista.
O tribunal adoptou esta decisión tras suspender o xuízo por segunda vez ante a incomparecencia deste acusado. Dáse a circunstancia de que Miguel B.R. fora citado hai meses e, coñecendo a data en que ía ser xulgado, embarcou como tripulante dun pesqueiro que faena en augas do Sur de África.
Xunto a Miguel, ían ser xulgados o seu irmán Manuel, e Antonio M.A., que si se presentaron á vista. No entanto, o tribunal tamén advertiu a Manuel B.R. da súa obrigación de comparecer na nova data de xuízo, fixada para o 15 de xaneiro, tendo en conta que tamén é mariñeiro e que pasa embarcado varios meses ao ano.
Así, a xuíza dispuxo as medidas solicitadas tanto pola Fiscalía como pola acusación particular, que sinalaron que o acusado prófugo mostrou unha "clara vontade de subtraerse á acción da Xustiza".
Pola súa banda, a defensa de Miguel B.R., xustificou a ausencia do seu patrocinado e explicou que "só unha vez pediu a suspensión" do xuízo. Nesta segunda ocasión, apuntou, foi a empresa para a que traballa a que se negou a facilitarlle a tempo o certificado de embarque. Ademais, esta avogada incidiu en que o acusado non pode negarse a traballar porque ten cargas familiares, e o armador xa lle advertiu de que "pode perder o traballo" se non se embarca nas mareas correspondentes.
XUÍZO POR LESIÓNS. Segundo o escrito de acusación pública, os feitos que se ían a xulgar este mércores tiveron lugar o 3 de outubro de 2010, cando a vítima, F.P.C., atopábase no porto deportivo de Baiona axudando a un amigo a achicar auga dunha embarcación. Un dos acusados, Antonio M.A., tiña un enfrontamento previo con F.P.C. e, acompañado dos outros dous procesados, presentouse no porto.
"Achegáronse a el e, actuando de común acordo, e coa intención de causar un menoscabo á súa integridade física, comezaron a agredilo con puñadas e patadas", sostén a Fiscalía no seu escrito de acusación.
A malleira provocou á vítima un traumatismo no beizo superior, hematomas nas pálpebras, fractura do tabique nasal, traumatismo nunha perna e fracturas en varias pezas dentais.
Por estes feitos, a Fiscal imputa aos acusados un delito de lesións causantes de deformidade, e pide para cada un deles tres anos de cárcere. Así mesmo, reclama que, entre todos, indemnicen á vítima en algo máis de 6.600 euros polas lesións ocasionadas.
