Oltra: "Os fascistas deixan ben claro que poden danar á miña familia"

A vicepresidenta do Goberno valenciano, Mónica Oltra, asegurou este xoves que co escrache do grupo ultradereitista España 2000 deste mércores pola noite ante o seu domicilio, "os fascistas" mandáronlle unha mensaxe "ben clara", que saben onde vive e que poden facerlle dano non só a ela, senón á súa familia.

En declaracións á Cadena Ser recollidas por Efe, Oltra agradeceu as chamadas de apoio recibidas por parte do president da Generalitat, Ximo Puig, e do delegado do Goberno na Comunitat, Juan Carlos Moragues, e explicou que durante o acoso estaba a cear cos seus fillos, que ao principio creron que era unha festa de Halloween montada na rúa.

Varios dos membros do citado grupo de extrema dereita estaban tapados por máscaras da película de terror Scream pero un deles puido ser identificado, grazas a un vídeo gravado polo xefe de gabinete de Oltra, como José Luis Roberto, líder de España 2000 en València e, segundo Oltra, un "personaxe perigoso" e moi coñecido. Segundo informa o diario Levante-EMV, cando a Policía Local chegou ao lugar dos feitos o escrache xa finalizara e non quedaba ningunha da vintena de persoas que o protagonizou.

Oltra, quen explicou aos seus fillos o ocorrido tras escoitar estes a noticia este xoves pola radio, cualificou de "moi edificante" a conversación mantida este mércores con Moragues e agradeceu que estea a intentar "reconducir" a situación tras as agresións da ultradereita durante o 9 d'Outubro, onde houbo "un exceso de confianza" e minimizouse" o problema".

Tamén lamentou o uso que a extrema dereita fai dos símbolos como a bandeira de España tras a que se parapetaron este mércores pola noite durante o escrache –difundido en directo por redes sociais–, pois é a insignia "de todos", advertiu de que os ultradereitistas están "envalentonados" e crense "co dereito a ser os donos da rúa" e anunciou: "Non nos imos a deixar vencer".