O viacrucis congrega a mulleres de todo o concello de Viveiro

Mulleres de todo o municipio vivariense sumáronse este martes ao viacrucis que conectou un ano máis ás parroquias da cidade do Landro. As participantes partiron da igrexa de San Francisco coa imaxe do Cristo da Beira Cruz (século XV), que portaron ata a Praza Maior, desde onde enfilaron a Santa María para recoller a talla de María ao pé da Cruz (Modesto Quilis,1908), que a comitiva devolveu ao momento de partida por Vilar Ponte e Cervantes.

As asistentes detivéronse ante láminas policromadas que representan as estacións para que unha lectora recordase cada unha das pasaxes do camiño cara ao monte Gólgota antes de que o párroco reflexionase sobre cada momento e invoque axuda para liquidar os problemas actuais.

O canto de Sálvea pechou en San Francisco a recreación do camiño cara o Calvario, que secundaron 14 penitentes coa cruz ao lombo, todas mulleres anónimas que acoden por promesas. O acto, representado de xeito íntegro por mulleres, culminou co traslado María ao pé da Cruz á antesala do museo, onde quedou preparada para a procesión da Paixón do Venres Santo pola noite.

DISCAPACITADOS. A Xunta de Confrarías solicitou respecto cara ás persoas con mobilidade reducida, para quen habilitou unha plataforma con rampla na Praza Maior, a unha altura suficiente que lles permita observar sen obstáculos as procesións.

A ocupación da mesma durante a tamborrada suscitou críticas nas redes sociais. Desde o Concello indicaron que tratarán de que un integrante de Protección Civil controle o acceso a ese espazo reservado. Este martes xa o fixo para asegurar un uso correcto.

Este mércores pola noite, ás dez, sae o viacrucis de homes desde a igrexa de San Francisco, acompañado polos cantos dos participantes e co Cristo a Agonía que preside o percorrido pola cidade do Landro.