Unhas 150 persoas participaron este domingo na I Festa da Troita con Xamón organizada pola federación veciñal na área recreativa de Rebordaos, no Veral, onde o Concello e a Deputación acometeron obras de acondicionamento nesta zona situada xunto ao río Mera, que no seu día foi un vertedoiro e que agora dispón de mesa, bancos e grelladas de cantería.
A alcaldesa, Lara Méndez, e o presidente provincial, Darío Campos, participaron nesta celebración, que se desenvolveu baixo unha carpa instalada na zona verde e que serviu para evitar a choiva caída durante a xornada.
Antes da celebración gastronómica, que se iniciou sobre as dúas da tarde, ambos os cargos, acompañados do concelleiro de medio rural, Miguel Fernández, e de representantes veciñais, visitaron as obras de arranxo que levaron a cabo nunha decena de pistas de varias parroquias. Os traballos afectaron a uns sete quilómetros de viarios de Locai, Marcoi, Santa María Alta, Rioboo, O Veral, As Campas, Astariz e Santo Matías.
Jesús Vázquez, presidente da federación veciñal, explicou que a festa tamén serve para pór en marcha o programa Entreparroquias, co que este colectivo "busca celebrar encontros entre os veciños da zona rural e coñecer os problemas de cada localidade".
Vázquez engadiu que nos próximos meses celebraranse encontros nos que se reunirán a grupos e asociacións de tres ou catro parroquias para escoitar as súas propostas e inquietudes de face a expor investimentos ás diferentes administracións.
CONVENIO. O titular da federación veciñal e o presidente da Deputación asinarán este martes un convenio polo que o ente provincial achegará unha subvención de 30.000 euros para financiar campañas de difusión e a actividade deste colectivo. A rúbrica terá lugar no local da asociación de Esperante, ás 12.00 horas.
O Veral recupera unha área recreativa xunto ao Mera
A federación veciñal organizou un certame dedicado á troita na zona acondicionada