O doutor Luis Ángel Montero é o novo director do servizo de traumatoloxía do Hospital da Costa. A cobertura deste tipo de xefaturas, ata agora vacantes, é unha aposta da Xerencia de Xestión Integrada, di, por consolidar o sistema sanitario e os distintos servizos.
A nova xerente executiva do Hospital de Burela, Carmén Durán, que foi nomeada hai poucas semanas en substitución do seu antecesor, Francisco Soriano, explica que o acceso do doutor Montero á xefatura de traumatoloxía contribúe á consolidación e potenciación destes servizos dentro do centro hospitalario. "O seu posto axuda á optimización dos procesos asistenciais de traumatoloxía e abre novas vías de colaboración con outros servizos, tanto hospitalarios como do ámbito da Atención Primaria".
Nesta nova etapa para o galeno, que leva moitos anos traballando no centro burelense, propón "mellorar a comunicación con Atención Primaria a través da creación de vías de contacto, acordos para a remisión dos pacientes ou o desenvolvemento de protocolos de telemedicina". Para todo iso contará coa estreita colaboración do equipo de profesionais que forma o servizo de traumatoloxía, un dos máis recoñecidos no Hospital da Costa, e que agora dirixe. De xeito máis concreto, Luis Ángel Montero contempla a remisión de pacientes á unidade de patoloxía musculoesquelética, formada polos servizos de Traumatoloxía, Reumatoloxía e Rehabilitación.
Outras medidas que quere implantar o médico son "protocolizar procesos internos" nos que estean implicados membros do servizo. Tamén quere potenciar a unidade de Cirurxía Maior Ambulatoria, outro dos obxectivos do servizo de Traumatoloxía do Hospital. "Un servizo de Traumatoloxía e Ortopedia moderno realiza máis do 50% dá súa actividade de maneira ambulatoria", explica o doutor Montero.
Outras medidas irán encamiñadas ao fomento da web do servizo dentro da páxina da área hospitalaria, como "elemento de información para os médicos e pacientes" e seguir mantendo a actividade docente, de formación e investigadora.
TRAXECTORIA. Luis Ángel Montero é licenciado en Medicina e Cirurxía pola Universidade de Santiago (USC) e obtivo a especialidade en Cirurxía Ortopédica e Traumatoloxía no Hospital de Meixoeiro, en Vigo. Ademais, posúe un máster en Xestión Hospitalaria do Centro de Estudos Financeiros de Madrid e, desde abril de 1997 ata a actualidade, Montero traballa no Servizo de Cirurxía Ortopedia e Traumatoloxía do Hospital da Costa.
Publicou máis de corenta traballos en revistas científicas nacionais e internacionais, ademais de recibir diversos premios, como unha mención de honra no XII Congreso Nacional e VII Internacional de Medicina Xeral por un traballo sobre Escordadura de boneca: inestabilidade escafolunar, unha entidade a ter en conta.
