O PSOE denuncia que Baltar gastou 42.000 euros en pulseiras, pins e toallas

O PSdeG denunciou este martes o gasto duns 42.000 euros en pulseiras, pins, toallas e outros materiais de propaganda por parte da Deputación de Ourense, presidida por Jose Manuel Baltar, en contratos co pavillón deportivo Paco Paz. Nun comunicado, o grupo socialista detallou un gasto de 10.454 euros en 1.800 toallas coa marca Ourensanía.

Segundo o PSdeG, trátase do mesmo empresario ao que lle abonaron "miles de euros polas pulseiras e pins" da marca Ourensanía, a pesar de que o pavillón "encadea, ano tras ano, perdas millonarias". "Entre toallas, pulseiras, pins e outros materiais publicitarios, Baltar xa gastou durante os últimos dezaoito meses, como mínimo, 42.000 euros públicos en materiais de propaganda que non repercuten en nada na economía provincial salvo nas contas dunha empresa", indica o PSdeG.

A este respecto, o portavoz provincial do PSdeG, Francisco Fraga, cualificou esa situación de "dispendio propagandístico absolutamente innecesario" que atribuíu á "obsesión" de Baltar en promocionar a citada marca.

O portavoz cuestionou que, en cambio, a Deputación non conceda "axudas para a seca que está a arrasar a agricultura ourensá, deixando o gando sen auga, impedindo os regadíos ou obrigando aos concellos a utilizar camións cisterna para abastecer aos veciños".

Por iso, advertiu de que o PSdeG estará "vixiante" ante a "inxente cantidade" de diñeiro vertido nesa empresa mediante "contratos menores que escapan de practicamente todos os controis públicos de transparencia".