O pleno da Deputación Provincial de Lugo aprobará, previsiblemente este martes, o Plan de Obras e Servizos (POS), que inclúe actuacións por importe de 5.563.736 euros, que serán sufragadas ao 80 por cento pola institución provincial e ao 20 por cento polos concellos beneficiados polas actuacións.
O programa inclúe obras nos 67 municipios da provincia de Lugo. En total, 87 obras, das cales 84 son de carácter municipal e tres son de carácter provincial.
Estas últimas serán sufragadas integramente pola Deputación e son as que maior dotación económica reciben, cuns 800.000 euros. Afectan a estradas provinciais que pasan polos concellos de Abadín, Friol e Pantón.
A maior contía, 372.088 euros, destinarase á mellora da LU-P-0102, de Fontevella a Carrizal, en Abadín
A de maior contía, 372.088 euros, consiste no ensanche e mellora da LU-P-0102, de Fontevella a Carrizal, en Abadín. Séguelle a rehabilitación do firme da LU-P-2102, de Friol a Parga, con 300.012 euros de orzamento, e a mellora do firme da LU-P-4109, de Ferreira a Goián, en Pantón, cun investimento de 127.000 euros.
O resto de actuacións, as de carácter local, suman un orzamento de 4.763.737 euros, dos cales o 82 por cento asúmeo a Deputación (3.677.977 euros) e o resto os concellos.
Nesta anualidade, a institución provincial ha triplicado a súa achega ao POS con respecto ao ano pasado, cando se investiron preto de tres millóns de euros en actuacións en 65 concellos, pois Trabada e Riotorto renunciaran a participar.
Este plan de obras foi acordado entre goberno e oposición, polo que é previsible que reciba o visto e prace da cámara provincial este martes.
CRITERIOS. Os fondos que achega a Deputación repartíronse entre os concellos en base a uns criterios comúns: poboación, superficie, entidades de poboación e esforzo fiscal.
Unha vez asignada a cantidade que lle corresponde a cada un, os gobernos locais formulan as súas propostas de obras, para axustar os investimentos ás súas necesidades. Ademais, deben asumir a parte que lles corresponde do gasto e son libres de amplialo con fondos propios se necesitan completar a obra e a dotación orzamentaria non é suficiente.
O resultado desta repartición é a listaxe que se achega, con 87 obras. A maioría céntrase en reparación de camiños, estradas e accesos a núcleos de poboación, así como na construción e mellora de redes de abastecemento de auga e de saneamento.
Inclúense tamén, aínda que en menor medida, acondicionamentos de edificios públicos de carácter social, dotación de moviliario e melloras na iluminación pública encamiñadas ao aforro enerxético.
Fontes da Deputación destacaron o esforzo económico que realiza a institución para manter o Plan de Obras e Servizos, despois de que o Goberno central decidise hai cinco anos eliminar a súa asignación. Anteriormente, o Goberno achegaba a metade dos fondos, a Deputación unha cuarta parte e os concellos a outra cuarta parte.
