O núcleo de Xove terá acceso ao servizo de gas natural antes de Nadal

A empresa Gas Galicia está a terminar as obras de canalización desta subministración no núcleo urbano de Xove e se se cumpren as previsións os veciños poderán ter acceso ao servizo "antes de Nadal", aseguran desde a firma. O alcalde de Xove, Demetrio Salgueiro, pide "desculpas" aos veciños polos inconvenientes que lles poidan ocasionar estas obras para a instalación "dun servizo máis do que van poder gozar". En todo caso, apunta que cando acaben os traballos o Concello "intentará que todo quede en perfecto estado".

Gas Galicia constrúe neste municipio unha rede de 5,3 quilómetros de canalizacións dos que máis de catro pertencen á capitalidade, onde as obras se empezaron no verán. En concreto, as rúas ás que chegará o gas serán José Bahamonde Illade, Tomás Mariño Pardo, Camiño Real, Avenida Deputación, Acceso Apeadeiro, Chozos e Rigueira. Cando se poña en marcha o servizo, din desde a compañía, "o 80% dos fogares, industrias e comercios da localidade de Xove poderán beneficiarse das vantaxes do gas natural". Tamén terá acceso ao gas a urbanización de Palmeiro, onde as obras xa terminaron. Neste municipio a empresa destina 750.000 euros á construción das canalizacións, que levarán o gas natural directamente desde o gasoduto mariñán.

O BNG local interesouse por este asunto recentemente e preguntaba ao goberno local se as rúas nas que se instala o gas serán obxecto dalgunha mellora unha vez terminen as obras, xa que o firme non sempre queda uniforme. O portavoz, Marco López, propuña reclamar algún tipo de compensación á empresa se non melloraba as rúas tras os traballos, pero o alcalde aclarou que "as rúas non van quedar así" e que o técnico municipal de obras está en contacto con Gas Galicia para coordinar remátelos.