A Ribeira Sacra conseguiu entrar na lista dos 100 mellores viños do mundo seleccionados polos críticos da revista norteamericana Wine & Spirits. O campanazo vólveo dar unha das adegas máis galardoadas da denominación, a de Pedro Rodríguez, da subzona soberina de Amandi, co seu caldo Guímaro 2014. É un dos dez seleccionados de España.
Os especialistas de Wine & Spirits están dedicados ao sector vinícola mundial, polo que realizan catas a cegas durante todo o ano nas denominacións máis recoñecidas, así como naquelas que destacan polo seu empuxe e presenza no sector.
Entre as cifras que indican os profesionais, figura que ao longo do ano son máis de 15.000 os viños que os expertos da publicación analizan por todas as esquinas dos planetas en busca dos mellores caldos.
Logo dunha criba conséguese elaborar unha lista dos 100 máis espectaculares. Entre eles está Guímaro, cuxo propietario será un dos adegueiros que o día 20 de outubro estea na entrega de premios que terá lugar na cidade de San Francisco.
O recoñecemento da colleita de 2014 dos caldos de Guímaro pola súa incorporación aos Top 100 de Wine & Spirits súmase aos incontables premios que ten acumulados desde que a adega se refundou a principios do século pasado logo dunha longa tradición familiar.
DESDE 2008. Guímaro está no cume das listaxes de mellores viños do mundo despois de que o crítico estadounidiense Robert Parker o destacase en varias ocasións desde 2008. No presente está na súa lista de viños con máis de 90 puntos, en concreto 95, o Guímaro Pombeiras de 2012 e La Penitencia, tamén do mesmo ano. Este último caldo elabórao Pedro Rodríguez con uvas de mencía de cepas vellas baixo a supervisión do enólogo Raúl Pérez.
Pero o currículo de Guímaro a nivel mundial comezou en 2008, cando apareceu na revista de Robert Parker, The Wine Advocate, entre os máis sobresalientes. Desde entón, e a pesar de que Parker cambiou en tres ocasións de catadores en España, os viños de Guímaro sempre se mantiveron entre os primeiros postos.
Para Pedro Rodríguez, "os recoñecementos constantes e por distintos expertos son unha proba de que a adega ten unha liña marcada de calidade cun traballo permanente en busca de novas experiencias, pero sempre baseadas na tradición", comenta Rodríguez.
Entre as claves para lograr que os viños saian cunhas características determinadas e que sobresaian está sobre todo a "coidada viticultura, a boa calidade das cepas e a técnica na vinificación logo dunha selección das mellores uvas das leiras máis recomendables. O segredo é buscar unha boa conxunción entre as producións", indica o adegueiro, quen en máis dunha ocasión participou en catas organizadas por Robert Parker.
No pasado mes de marzo, Pedro Rodríguez estivo en Londres, do mesmo xeito que Fernando González, produtor dos tamén prestixiosos viños Algueira.
A adega de Pedro Rodríguez ten presenza en todo o mundo, pero non sempre coas mesmas marcas. Nalgúns lugares non aparece a firma Guímaro como tal, dado que depende de estudos de mercado. Por exemplo, o primeiro recoñecemento por Parker foi dun Guímaro que se presentou como El Pecado.
Entre as últimas iniciativas da adega, á parte de ampliar a súa produción, desde hai un ano ten nova imaxe corporativa.
