O goberno de Palas non dimitirá a pesar da condena por acoso e prevaricación

A Audiencia Provincial de Lugo ditou unha contundente sentenza na que considera que o actual alcalde, Pablo Taboada, e o seu antecesor no cargo e agora edil, Fernando Pensado, confabularon con outros sete concelleiros e funcionarios municipais para someter a un acoso laboral sistemático á secretaria municipal, Celia González Vázquez. Taboada e Pensado reciben as maiores penas, xa que son os únicos condenados por dous delitos. Polo de prevaricación impónselles 9 e 8 anos de inhabilitación para cargo electo, mentres que polo de mobbing afrontan cada un quince meses de prisión.

A prevaricación cometeuse, segundo a sentenza, na convocatoria e celebración do pleno extraordinario no que se decidiu destituír á secretaria. Nese pleno tamén votaron a favor os aínda concelleiros José Ramón García Vázquez, Amando Sande Agra e María Aurora Vila Agra, ademais da xa exedil María Cristina Lodeiro Castiñeira. Cada un deles recibe unha pena de sete anos de inhabilitación especial para calquera cargo electo.

As penas de prisión, no entanto, son as que leva o delito de acoso laboral, que o tribunal considera que Taboada e Pensado cometeron tanto de facto, hostigando á funcionaria, como por omisión, ao ter ambos os autoridade para telo evitado e non facer nada respecto diso. A Audiencia Provincial tamén sinala como partes fundamentais e activas nesta fustrigación á secretaria aos funcionarios municipais Carlos Ouro Villamor, a quen impón 12 meses de prisión; Juan Manuel Varela Portela (9 meses) e María Luisa Novo Santos (6 meses). Os cinco deberán indemnizar ademais solidariamente a Celia González con 12.000 euros.

No entanto, os xuíces non ven motivos para sentenciar a ningún dos acusados dos delitos de falsidade en documento oficial e en certificados, infidelidade na custodia, fraude en subvencións, malversación, usurpación de funcións públicas e posesión de cargo público sen requisitos que solicitara a acusación particular.

Das once persoas que sentaron no banco dos acusados, o tribunal só absolve á funcionaria local Marta María Penas e a José Norberto Uzal Tresandi, director xeral de Administración Local da Xunta no momento dos feitos.

OS FEITOS. A Audiencia Provincial considera probado que practicamente desde o mesmo momento en que tomou posesión como secretaria interventora, en decembro de 2007 e sendo aínda alcalde Fernando Pensado, Celia González comezou a ser obxecto de menosprezo e de acoso laboral por parte do funcionario Carlos Ouro, actitude á que aos poucos se foron unindo os outros dous funcionarios condenados. Este acoso, razoan os xuíces, contou ao principio co beneplácito e despois coa participación activa primeiro de Pensado e logo, unha vez que accedeu á alcaldía, de Pablo Taboada.

Boa parte dos máis de trinta folios da sentenza dedícaos o relator, o maxistrado José Manuel Varela Prada, a recoller a retahíla de insultos, accións de presión, menosprezos e expedientes disciplinarios aos que foi sometida a funcionaria, que "pon de manifesto unha actividade reiterada dos cinco acusados que puxeron en cuestión a actuación da secretaria, insultárona, controláronlle o seu traballo, dificultáronlle o desempeño da súa profesión non dándolle os documentos dos que ela era custodia e colocábana en situacións que limitaban as súas posibilidades de traballo dando lugar a unha situación na que a secretaria tivo que verse en situación de fustrigación e humillación que concluíu na baixa por depresión a consecuencia de tal trato despectivo e despreciativo por parte de todos os acusados aínda que en maior e menor medida uns e outros".

O culmen deste acoso foi o pleno extraordinario no que se decidiu a destitución da secretaria, guiados por informes incompletos, sen que este órgano tivese capacidade para iso e sendo previamente advertidos.