Un grupo composto por tres individuos, que viaxaban nunha furgoneta da marca Fiat, subtraeu 150 palés que estaban apilados no exterior dunha nave dunha empresa de Fazouro e que os seus propietarios deixaran preparados para montar neles os envíos, tanto de peixe fresco, como conxelado, de comezos da semana. O fundador da firma adoita ir dúas ou tres veces ao día polas instalacións, non en balde "custou levantar todo isto" e así o fixo o domingo, ás once da mañá. Cal sería a súa sorpresa cando se topou case de bruzos cos ladróns, cargando o material. Ao velo, fuxiron a gran velocidade co vehículo, o que impediu "que volvesen para facer outra viaxe e seguir furtando mercancía", asegura o dono, que valorou as perdas en 800 euros.
"Levaron 150 palés que nós compramos a cinco euros polo menos cada un e que eles venderán a un, dous ou tres euros", sinalan os propietarios. Con todo, para o fundador da empresa "incorre en maior delito o que a compra, nunha especie de mercado ilegal, consciente de que está a comprar material que lexitimamente era de alguén".
Cando chegou ás instalacións, o fundador achegouse ata situarse detrás dos ladróns. Ao velo, eles empezaron a recoller rápido para fuxir e o dono recoñece que se deu a volta, porque: "Que ía facer? Encararme con eles directamente, perseguilos?". Por iso, avisou á Garda Civil e interpuxo este luns a denuncia.
O propietario está convencido de que estaban a facer varias viaxes cargando os palés e que a súa presenza impediu que volveran a por máis. De feito, el viu como a súa presenza fixo posible que, "nesa viaxe xa non lles dese tempo a cargar nada e tiveron que abandonar o lugar rápido".
Opina que: "Deben de ter algún lugar, unha casa ou algo cerca, para depositar a mercancía segundo van enchendo a furgoneta", especulaba este luns.
O polígono de Fazouro carece dun servizo de vixilancia, mediante cámaras, ou de vixiantes de seguridade, co que ata certo punto pode entenderse que está aberto o acceso ao recinto. A instalación en cuestión está pendente de fabricar un peche que impida estes roubos, porque lles resulta máis práctico, por operatividade e por espazo, deixar parte dos palés fóra.
"Estiven a atrasar a obra do peche, pero vouna empezar a executar", avanzou este luns o fundador. Si dispoñen dun equipo de videovixilancia que captou ao vehículo e aos ladróns. "Afortundamente non houbo que atrasar ningún envío pola falta de palés porque contamos cun stock", matizou o fillo do fudador e xerente da empresa.
ROUBOS EN BURELA. Da confraría burelense tamén subtraeron 30 caixas de carnada de xarda dun palé; un roubo duns 180 euros. Outra empresa do lugar, do puerte burelense, sufriu un acto vandálico nun camión e o roubo de diverso material. Hai un ano tamén lle roubaron pero non tivo noticias o propietario de que detivesen a ninguén polo anterior delito. Algúns usuarios demandan vixilancia nocturna na dársena portuaria, na que xa operan dous vixiantes de seguridade.
O dono dunha empresa evita que lle rouben máis de 800 euros en palés
O fundador dunha recoñecida firma mariñá de conservas e peixes achegouse por casualidade a mañá do domingo á nave de Fazouro onde sorprendeu aos ladróns