O Concello prevé mellorar accesos e iluminación do polígono do Morelle

O Concello sarrián prevé mellorar accesos e a iluminación do polígono industrial do Morelle. Esta actuación conta cun orzamento de preto de 100.000 euros e o Concello aprobou na última xunta de goberno local solicitar unha subvención á Xunta de Galicia para poder executala, segundo sinalou o concelleiro de obras, Diego López.

Os traballos suporán acondicionar accesos e pavimentar os viarios arredores ao parque empresarial, como unha pista que rodea o polígono e discorre paralela á estrada que comunica co corredor de Monforte. O proxecto inclúe dotar de canalización de pluviais e de iluminación.

Algunhas zonas do polígono atópanse sen iluminación e contan con puntos de luz particulares. Por iso, proxéctase instalar iluminación con tecnoloxía led, como do que xa dispoñen outras vías do polígono do Morelle.

A Administración autonómica concedeulle o pasado ano ao Concello unha axuda para melloras no parque empresarial, aínda que renunciou a ela. Entón dispuña dunha subvención de preto de 100.000 euros da Consellería de Economía e Industria para construír beirarrúas e dotar de iluminación a contorna de nove nave situadas na zona deste do polígono.

NOVAS ILUMINARIAS. Doutra banda, o Concello renovou a iluminación pública das rúas Greco e Fiz Vergara, instalando tecnoloxía led, informou Diego López. Tamén se cambiaron algunhas luminarias na zona da estación, do coñecido como ponte de Don Fermín e a Rúa Castelao. Esta actuación executouse con cargo a unha subvención outorgada o pasado ano pola Xunta.

Segundo explicou o concelleiro, o obxectivo do goberno municipal é cambiar todas as luminarias do municipio por un sistema de aforro enerxético.