O Concello de Vilalba traballa actualmente na elaboración dun plan para mellorar a accesibilidade viaria do centro urbano e dalgún edificio de titularidade municipal. Para iso, está a realizarse un estudo para analizar o estado das rúas e beirarrúas e ver que actuacións habería que levar a cabo para "facer transitables todas e cada unha" das vías, tal e como manifestou o alcalde, Agustín Baamonde.
Dentro deste plan tamén se está valorando a posibilidade de instalar un ascensor na biblioteca, único edificio municipal que aínda non é totalmente accesible. "No concello, a casa da cultura e o auditorio xa o hai, pero non na biblioteca, que conta co agravante de que o salón de actos está na segunda planta", apuntou o rexedor.
Aínda así, Baamonde destacou que "o que máis preocupa" ao goberno local "é a accesibilidade viaria". "Basta con dar un paseo por Vilalba para ver que as beirarrúas ou non teñen rebaixes ou as que os teñen non cumpren coa normativa", dixo o alcalde vilalbés, que engadiu que é importante cambiar isto "para as persoas con mobilidade reducida, sobre todo as que van en cadeiras motorizadas, que se poden quedar paradas se non é a inclinación adecuada", aínda que tamén para facilitar o paso das normais ou os carriños de bebé.
Unha vez que se conclúa o estudo, realizarase un proxecto no que se reflectirá finalmente que obras hai que realizar e a súa contía, "aínda que haberá que actuar practicamente en todas, porque a idea é facelas todas transitables". En canto ao prazo que manexa o Concello, Baamonde apunta que dependerá do que haxa que facer finalmente. "Se podemos facelo nun ano, ben, pero igual non é posible. Se non, nun par de anos estará resolto un problema importante que hai en Vilalba, porque a accesibilidade que hai é algo que deixa bastante que desexar", asegurou Baamonde.
XULGADO. Outro edificio público vilalbés cuxa accesibilidade é practicamente inexistente é o xulgado, que conta con tres plantas e unha entrada con varios chanzos. Agustín Baamonde avanzou a intención da Xunta de dotar estas dependencias dun ascensor proximamente.
