O alcalde de Friol, o popular José Angel Santos, anunciou que este sábado o Concello disporá de autobuses, con saída ás 10.30 horas da casa consistorial, para desprazar a veciños á cidade de Lugo a unha manifestación convocada ás 12.30 horas ante o Obispado polo traslado dun cura que leva doce parroquias neste municipio e outras dúas no de Guitiriz.
Santos comprometeuse a ir á manifestación. "Alí estarei como un veciño máis apoiando aos meus", manifestou. Comentou, así mesmo, que se puxo en contacto co Obispado e explicou que o bispo de Lugo, Alfonso Carrasco Rouco, comunicoulle que "foi unha orde directa sen contar coa opinión do cura" para este cambio.
José Ángel Santos: "Non compartimos ese modo de que unha institución leve a cabo unha decisión deste tipo, xerando un problema onde non o hai"
Tamén lamentou que noutro momento que fala co vigairo xeral a súa actitude foi "ditatorial" e non "conta coa postura do pobo". Santos describiu ao párroco José Ramón como "unha persoa involucrada coa sociedade e moi querida pola xente, que está metido no día a día do concello axudando a varias familias necesitadas".
"Temos que apoialo ata onde sexa necesario. Se antes do sábado non hai unha solución, que non a vai a haber, imos seguir coas mobilizacións máis aló", advertiu.
Este traslado "forzoso" enmárcao nunha "decisión ditatorial, totalitaria e sectaria". "Non compartimos ese modo de que unha institución leve a cabo unha decisión deste tipo, xerando un problema onde non o hai", protestou. José Angel Santos calculou que xa dispoñen de "5.000 firmas" que se opoñen á marcha do cura, que tamén provocou contestación no municipio veciño de Guitiriz contra o seu traslado.
Así mesmo, a Federación de Asociacións de Vecinos de Lugo rexistrou un documento ante o Obispado de Lugo no que se pon de manifesto que esta medida "é ditatorial, arbitraria e vai en contra da vontade de todos os veciños". Por iso piden á maxistratura eclesiástica que "reconsidere a súa postura", á vez que anuncian tamén a súa presenza na manifestación do sábado.