O Concello da Fonsagrada iniciou a tramitación dun expediente de regulación de emprego (Ere) para despedir por segunda vez a doce traballadores que tivo que readmitir por sentenza xudicial. Estes operarios formaban parte do Grupo de Emerxencias Supramunicipal (GES) e os seus contratos expiraron en decembro, o Concello non os renovou e a xustiza determinou que os despedimentos foron irregulares, que debían ser readmitidos e os seus salarios abonados.
O Concello da Fonsagrada acatou as sentenzas e readmitiu aos doce operarios, pero o mesmo día que se incorporaron foron obrigados a iniciar un período de 15 días de vacacións e o goberno local comezou a tramitación do Ere de despedimento colectivo.
O alcalde, o socialista Argelio Fernández Queipo, explicou que os postos que ocupaban os doce operarios xa non existen no persoal municipal, polo que non poden reincorporarse a eles. O Concello non renovou o convenio coa Xunta e a Deputación para financiar o grupo de urxencias e este ano non se constituíu.
Engade que a obrigación de readmitir a estes traballadores supón "inestabilidade económica" para o Concello da Fonsagrada, que tivo que "facer un plan de axuste por incumprir a regra de gasto". O rexedor apunta que "os incumprimentos da Xunta e os atrasos no abono das subvencións obrigan aos concellos a asumir máis gastos do debido, ou da Fonsagrada non pode e tivo que prescindir do servizo".
Argelio Fernández recorda que as sentenzas xudiciais que obrigan a readmitir aos traballadores sinalan que o despedimento foi mal exposto, pois tramitouse como individual cando debía ser colectivo. "Con este Ere facemos un despedimento colectivo, que é o que din as xuízas que tiñamos que ter feito", sentenciou.
NOTIFICACIÓN. Os traballadores afectados séntense "indefensos" porque consideran que o Ere está a negociarse ás súas costas. Afirman que ningún dos afectados está na comisión de negociación e que non se senten defendidos polo comité de empresa, integrado por representantes de UXT e CC.OO. Explican que este martes recibiron a notificación do expediente, aínda que saben que "xa se fixeron tres reunións da comisión negociadora das que non fomos informados".
Acusan o Concello de perseguir o seu "despedimento custe o que custe, incluso con sentenza en contra", e de actuar "con mala fe" para burlar as resolucións xudiciais.
