O Carballiño elabora a tapa de polbo máis grande do mundo en 11 minutos

Unha trintena de pulpeiros da localidade ourensá do Carballiño elaborou este martes a tapa de cefalópodo máis grande do mundo, unha fazaña realizada nun tempo marca de dez minutos e 56 segundos, con cincocentos quilogramos de polbo perfectamente cortado e aderezado con sal, aceite e pemento nun prato de madeira de piñeiro cun diámetro de 5,37 metros. Acto seguido, e antes de que se arrefriase o polbo, procederon a repartir entre os asistentes as máis de 1.500 tapas de tamaño normal nas que se puido dividir a media tonelada de cefalópodo.

Por un prezo de cinco euros, o público puido gozar deste manxar acompañado de produtos galegos, como un vaso de viño, un anaco de pan de Cea e unha sobremesa de chocolate, ademais dun pequeno prato de recordo. "O único truco para ser tan rápido é facelo desde que naces", explicaba Isaura García, presidenta da asociación de pulpeiros de Arcos, cuxas mans tomaron parte na fazaña.

Non se poñen nerviosos, afirma, porque é algo que lles gusta facer. "Para nós nin sequera é como un traballo", asegurou. 

E é que ata duascentas familias da vila viven do polbo, segundo cifras do alcalde, Francisco Fumega, que declarou a Efe que para esta localidade "é un sector económico fundamental". Con respecto á iniciativa da tapa de polbo xigante, o rexedor do Carballiño recoñece que "é tan mediática" que dá "unha publicidade" que o pobo "nunca podería pagar".

Nesta edición, o obxectivo centrábase en conseguir un tempo de picado de récord, por iso reduciron a cantidade de polbo con respecto ao ano pasado de 750 a cincocentos quilogramos. Con todo, volveron a bater a súa propia marca con respecto á edición de 2015 na que se troceó o mesmo número de quilos, pero foi necesario un minuto máis para completar a tapa.

A elaboración da tapa de polbo máis grande do mundo é a antesala do gran día da 55 edición da Festa do Polbo, que se celebrará este domingo, 13 de agosto, cun xantar multitudinario para o que se esperan máis de 50.000 persoas.