O Campo da Feira de Parga loce renovado e mellora as dotacións dos polbeiros

A Comunidade de Veciños do Campo da Feira de Parga acondicionou a zona na que tradicionalmente se colocan os polbeiros os días de feira grazas a un convenio coa Deputación de Lugo. A actuación, cun orzamento de 30.901,70 euros, supuxo a renovación das redes de rede de sumidoiros e dunha superficie duns 400 metros cadrados de chan, que se recubriu con zahorra natural e artificial.

A intervención completouse coa colocación de seis postos individuais de granito, dotados de luz e auga, para o uso dos polbeiros, así como varios bancos de granito e madeira. Ademais, acondicionáronse as varandas de madeira, substituíndo as que estaban en peor estado -está pendente o seu vernizado-, e as escaleiras máis deterioradas.

O presidente dos propietarios do Campo da Feira, David Díaz, explicou que a actuación estaba prevista desde hai dous anos. De feito, o convenio asinouse xa co anterior presidente da Deputación, José Ramón Gómez Besteiro. Con todo, o proxecto orixinal, orzado nuns 36.000 euros, non puido executarse, xa que Patrimonio non concedeu o permiso para colocar na zona do polbo un chan de baldosas de granito silvestre, finalmente substituído pola zahorra. Tamén houbo conflito polo material dos postos do polbo, aínda que se puido manter a idea da comunidade de veciños, que era usar granito e non formigón.

PROXECTOS. A próxima actuación será preservar a zona da feira, evento que se celebra dous domingos ao mes. Díaz explica que solicitarán ao GDR2 unha axuda para empedrar, con pedra natural, o chan dos dous alpendres centrais do recinto, agora con asfalto, ao que se sumará o arranxo do acceso da parte de abaixo do campo da feira. Ademais, esperan poder colocar canlóns nos alpendres e acondicionar a zona de aparcadoiro que hai diante do centro de saúde.