Subímonos ao novo modelo de Renault: o Mégane Sport Tourer

A cuarta xeración do Mégane xa conta coa súa variante Sport Tourer, un modelo que non só presume de posuír unha maior capacidade de carga con relación á berlina, senón que tamén achega uns trazos estéticos diferenciadores e de gran personalidade.

Todo iso está avalado, ademais, por unha ampla oferta mecánica así como por un alto nivel de equipamento en canto a sistemas de asistencia á condución, confort e seguridade.

Do mesmo xeito que na berlina, o Mégane Sport Tourer benefíciase da nova imaxe de marca, introducida polo deseñador Laurens Van dean Acker. A parte frontal non presenta apenas diferenzas coa berlina, caracterizándose polos grupos ópticos dianteiros en forma de C. As maiores diferenzas aprécianse, como é normal, na parte traseira, aínda que os máis observadores notarán que esta versión familiar é tamén 27 centímetros máis larga que a berlina, para chegar a unha lonxitude total de 4,62 metros. O curioso neste modelo é que, ademais de ser 6 centímetros máis baixo que o compacto, a lonxitude non a gana en base a un maior voladizo traseiro senón que o fai grazas a unha maior distancia entre eixos, concretamente, 2,71 metros que se traducen en catro centímetros máis do que ofrece as cinco portas.

Cun maleteiro de 580 litros, o Mégane Sport Tourer preséntase cunha boa alternativa para todos aqueles que necesiten un maior espazo de carga, pero tamén para os que buscan un coche de imaxe e personalidade diferenciadora. En todo caso, esta versión familiar ofrece facilidades que o compacto non pode dar, como é un interior moito máis habitable e funcional.

Na segunda fila de asentos é onde máis se nota os centímetros extra que gaña a carrocería familiar, xa que ofrece ata 21,6 centímetros de espazo para os xeonllos, mentres que a altura do teito é o suficiente como para que calquera adulto poida viaxar nas prazas traseiras con absoluta comodidade, independentemente da súa altura.

As formas aproveitables do maleteiro compleméntanse coas posibilidades de abater os respaldos dos asentos traseiros en dous partes. Ademais, tamén se pode facer o mesmo co asento do copiloto, o que fai que sexa posible cargar nos seus interior obxectos de ata 2,70 metros de longo. 

INTERIOR. No interior, destaca unha pantalla vertical de 8,7 polgadas cunha sensación visual similar á dunha tablet, debido á súa posición vertical. Ademais, incorpora, entre outras, a tecnoloxía Multisense ?que permite personalizar a condución? un regulador de velocidade adaptativo, alerta de cambio de carril, freada activa de urxencia e axuda ao aparcadoiro.Motores. Mecanicamente, a familia Mégane articúlase entre catro variantes diésel e dúas gasolina. Os primeiros son o Energy dCi de 90, 110, 110 Hybrid Assist e 130 cabalos, mentres que os segundos pertencen á familia TCE, en variantes de 100 e 130 cabalos.

No alto da gama aparece o acabado GT cunha imaxe máis deportiva. O seu motor máis potente é a gasolina de catro cilindros e 1.6 litros de 205 cabalos, asociado a unha caixa de cambios automática de dobre embrague e sete velocidades. Tamén está dispoñible unha versión diésel de 165 cabalos.

Nunha primeira toma de contacto coa versión 1.6dCi de 130 cabalos, a variante que posiblemente sexa a máis demandada, o Mégane revelouse como un excepcional rutero cunha resposta suave e lineal que invita a longos desprazamentos. Os consumos mantéñense tamén moi axustados e en condicións reais de tráfico é fácil que se manteñan por baixo dos seis litros.