Neymar podería denunciar ao Barça

O agora dianteiro do París Saint-Germain, Neymar da Silva, estaría a se preparar para denunciar ao seu antigo club, o FC Barcelona, por non terlle abonado os 26 millóns de euros que lle corresponderían ao renovar o seu contrato en novembro de 2016. Segundo o portal de noticias deportivas brasileiro 'Globoesporte', o xogador e o seu exequipo poderían chegar á Cámara de Resolucións de Disputas da Fifa durante a próxima semana.

O Barcelona debía pagar a Neymar 26 millóns como prima de renovación, pero por mor das negociacións do dianteiro co PSG, decidiu consignar esa cantidade ante notario, á espera de coñecer se o xogador marchaba finalmente a París ou seguía vestindo a camiseta azulgrana. Dado que Neymar decidiu rescindir unilateralmente o seu contrato para fichar polo PSG, en contra do desexo do Barça, o club catalán recuperou esa cantidade depositada ante notario e anunciou a súa decisión de non abonarlla ao futbolista.