Netanyahu "rexeita" a "vergoñosa" resolución de condena da Onu

O primeiro ministro israelí, Benjamín Netnayahu, condenou este venres con dureza a resolución aprobada polo Consello de Seguridade da Onu que esixe o final da colonización israelí do territorio palestino ocupado e trata de garantir a viabilidade da solución de dous estados. "Israel rexeita esta resolución na Onu vergoñosa e anti-israelí e non vai cumprir os seus termos", sinalou o primeiro ministro nun comunicado, no que ataca directamente ao presidente estadounidense, Barack Obama, que se negou a exercer o veto contra a resolución.

"Nun momento no que o consello de Seguridade non fai nada para frear a matanza de medio millón de persoas en Siria, ataca vergonzosamente á única verdadeira democracia de Oriente Medio, Israel, e chama ao Muro Occidental (Muro das Lamentacións) territorio ocupado", sinala a nota. "A administración Obama non só fracasou en protexer a Israel contra esta conspiración na Onu, senón que se confabulou con ela entre bastidores", agrega a mensaxe, que engade que está a desexar "traballar co presidente electo (Donald) Trump".

REACCIÓN DE EE.UU. Estados Unidos defendeu a súa abstención na Onu e recordou que leva case cinco décadas pedindo deter a súa expansión. A embaixadora estadounidense, Samantha Power, asegurou que a postura da Administración de Barack Obama ante o texto vai en liña coa posición histórica do país, tanto con gobernos demócratas como republicanos. "Estados Unidos estivo trasladando a mensaxe de que os asentamentos deben acabarse, en público e en privado, durante case cinco décadas", dixo Power.

TRUMP. O presidente electo, Donald Trump, que buscou sen éxito frear unha condena aos asentamentos israelís na Onu, asegurou que as cousas van cambiar na organización cando asuma a presidencia. "Sobre a Onu, as cousas van ser diferentes tras o 20 de xaneiro", asegurou Trump nunha mensaxe a través de Twitter.