Nausti, Illán, Albense e Santaballés loitan pola Supercopa

Catro equipos chairegos lograron a clasificación para a Supercopa na competición de fútbol veterano. O Nausti Xamóns Atilano, o Albense e o Santaballés foron os primeiros clasificados nos grupos B, C e D respectivamente, mentres que o Illán foi segundo no B.

O Cospeito, o Montouto e o Saavedra disputarán a Copa, mentres que Sancovade e Castro -que entrará a xogar na segunda fase desta competición- estarán na Minicopa.

Na última xornada da fase de grupos da Copa, o Nausti goleou (5-0) ao Montouto e o Albense fíxoo por (7-1) ao Dona Vaniri. O Cospeito levou por (2-0) o derbi chairego contra o Sancovade, mentres que o Illán logrou a vitoria por (1-0), ante o Gaioso. O Saavedra non puido pasar do empate a dous goles co San Lázaro.

Este fin de semana arrincará a competición ligueira. En Primeira División, o Albense visita ao Taboada e o Nausti ao Friol, ambos o sábado ás 16.30 horas. O Sancovade-Illán e o Santaballés-Saavedra xogaranse ás 17.00.

A esa mesma hora disputaranse os partidos Guntín-Castro, Cospeito-Spórting Rabadense e Montouto-PC Box de Segunda División.

Comentarios