O rexedor de Friol, o popular Antonio Muiña, contará no seu equipo de goberno con tres tenencias de alcaldía. A primeira recaerá, unha vez máis, en José Antonio Abuín Villar; a segunda, en Juan Carlos Casal Pena, que se estrea como concelleira, e a terceira, en José Ángel Santos Sánchez.
Así o adiantou onte o alcalde, que acaba de ser investido rexedor por sétimo mandato consecutivo. Segundo avanzou, xa decidiu a organigrama que terá o goberno local, unha configuración que levará ao pleno nos próximos días para a súa ratificación.
Antonio Muiña explicou que o primeiro tenente de alcalde, José Antonio Abuín, encargarase da delegación xeral da alcaldía e dos servizos de atención ao administrado, estatística e padrón. Juan Carlos Casal Pena levará as áreas de xestión urbanística, vivendas sociais, planificación de infraestruturas e coordinación de proxectos e parques e xardíns. En canto ao terceiro tenente de alcalde, José Ángel Santos Sánchez, levará o relacionado con obras e servizos, medio rural -gandería, agricultura e montes-, e festas, feiras e mercados.
Do mesmo xeito que en anteriores mandatos, Mauro Mourín González seguirase encargando das delegacións de medio ambiente, sanidade e consumo. Pola súa banda, Isabel García Pacín levará as áreas de cultura, servizos sociais, promoción do emprego e movementos asociativos. Para rematar, Josefa Janeiro Vizcaíno, que se estrea na corporación, levará as delegacións de deportes, educación e formación, familia, muller e infancia.
Precisamente, esta última concelleira estreouse no seu novo cargo este luns ao presidir, con Antonio Abuín, os actos de final de curso de Preescolar na Casa. A esa xornada de convivencia celebrada no centro social asistiron, entre outras persoas vinculadas ao programa, os 24 nenos frioleses que participaron e as súas nais.
