Morre Rogelio Hernández, a voz de Paul Newman, Marlon Brando e Michael Caine

O actor de dobraxe Rogelio Hernández, que foi a voz no cine de Paul Newman, Marlon Brando ou Michael Caine, morreu esta pasada fin de semana en Barcelona aos 81 anos, segundo informa a Asociación de Actores de Dobraxe.

Rogelio Hernández (Barcelona, 1930) deixou a súa voz para a historia do cine e a dobraxe en infinidade de películas, dando vida para o público español a Paul Newman, Jack Nicholson, Marlon Brando, Michael Caine, Jean-Paul Belmondo e Tony Curtis, entre outros.

O funeral realizouse esta mañá no tanatorio de Les Corts de Barcelona.

"Teño a impresión desde sempre, que salvo para uns poucos, a actividade de dobrar películas foi e é, algo descoñecido e ata certo punto inherente, algo natural", dicía o propio Hernández na súa páxina web en defensa da profesión.

Salvo os grupos máis intelectuais, "o público vai ao cine a divertirse, a distraerse, a reir, a pasar medo, a emocionarse e estou convencido de que moi poucos comentarán o saír da sala de exhibición '¡que ben dobrada está a película que vimos', senón, 'que boa película ou que mala ou regular", continuaba.

Considerado un dos mellores actores de dobraxe, Rogelio Hernández participara nun milleiro de filmes e en 2008 viuse obrigado a retirarse por problemas na vista.

Comentarios