A memoria de Navia de Suarna en 500 fotografías

Se unha imaxe vale máis que mil palabras, as 500 fotografías recuperadas por alumnos e profesores do CPI Plurilingüe Doutor Daniel Monje de Navia de Suarna constitúen un amplísimo documento histórico sobre como era a vida neste municipio da montaña luguesa a mediados do século pasado.

A colección, titulada Navia, Lembranzas con Futuro, pódese visitar xa a través da plataforma web phottic.com e a intención dos seus promotores é continuar ampliando progresivamente este álbum ata chegar ás 2.000 fotografías que, ata o momento, foron achegadas polos veciños e que ven nesta iniciativa non só unha forma de recuperar o seu pasado senón tamén un modo de poder difundilo entre as próximas xeracións a través das novas tecnoloxías.

Desde o instituto naviego están moi satisfeitos da acollida desta iniciativa e da oportunidade de poder difundir moitas das historias persoais dos veciños da época, aínda que o seu director, Francisco Trashorras, fai tamén un chamamento para que todas aquelas persoas do municipio que teñan fotografías antigas cédanllas para poder dixitalizalas e así "incrementar un álbum que queremos compartir con todos".

Trashorras defende a necesidade de conservar o patrimonio fotográfico a través das posibilidades que dan as tecnoloxías dixitais, á vez que, xunto ao resto do cadro directivo do CPI de Navia, agradece a súa colaboración a todos eses veciños que contribuíron a facer realidade "esta compilación fotográfica", logo de anos nos que tiveron "o coidado impagable de conservar estes documentos gráficos", que axudarán ás novas xeracións de naviegos "a coñecer mellor as súas orixes".

Segundo explica desde a plataforma phottic.com, de recente creación e orixe galega, a exposición destas imaxes na web fai que as vellas fotos dos álbums familiares recobren un novo sentido e pasen a formar parte "dunha pequena historia colectiva e converterse nunha didáctica visión do que fomos para comprender mellor o que somos".

Na actualidade, esta plataforma alberga máis de 15.000 fotografías históricas de Galicia, que pertencen tanto a proxectos públicos como privados de diferente índole.