Medrar por demérito dos demais

OS PARTIDOS andan dos nervios. Será pola proximidade das eleccións (sobre todo das determinantes xerais de dentro de case un ano e non as municipais e autonómicas nas comunidades non históricas de maio), será pola ascendencia de Podemos, será pola contestación interna nos dous principais partidos. A saber, pero PP e PSOE andan histéricos, porque ata agora, desde os anos oitenta, só se disparaban mutuamente, pero desde hai uns meses as balas dispérsanse porque os artificieiros non saben ben a quen apuntar. As estratexias racharon coa irrupción dun inesperado partido, iso trastocouno todo, pero se a filosofía para volver á situación anterior é pactar entre os dous grandes, facilitará máis apoio para o terceiro protagonista, que así pode incluso converterse en primeiro. O PP chegou ao goberno por demérito do PSOE, e Podemos vai camiño de aproveitar o desprestixio dos dous.