Máis de medio millón de persoas abandonan os seus fogares fuxindo do conflito

Máis de medio millón de malianos abandonaron os seus fogares fuxindo do conflito que asola o seu país e refúxianse en países veciños ou vagan como desprazados no interior, denunciou hoxe o Programa Alimentario Mundial (PAM).

Segundo os datos da Organización Internacional das Migracións (OIM) -recollidos pola gobernamental Comisión sobre o Movemento de Persoas- do total de persoas que deixaron as súas comunidades de orixe, 228.918 son desprazados internos. A maioría atópanse nas rexións de Bamako, Segou, Kayes, Koulikoro, Sikasso e Mopti.

REFUXIADOS EN PAÍSES VECIÑOS
Con respecto aos refuxiados malianos acollidos na rexión, o Alto Comisionado de Nacións Unidas para os Refuxiados (ACNUR) contabilizou 144.500, pero son os que teñen rexistrados. Deles, 54.100 en Mauritania, 50.000 en Níxer, 38.000 en Burkina Faso, 1.500 en Alxeria, e pequenos grupos en Guinea e Togo.

Tras os combates do fin de semana entre o Exército maliano, con apoio francés, e as milicias islamitas radicais, incrementouse o número de persoas que abandonaron os seus fogares e que cruzaron as fronteiras veciñas. "O reconto é moi difícil por mor da inseguridade. E a situación é moi fluída. Contabilizamos movementos de ''centenares" de persoas, pero dada a situación, cremos que esas cifras se incrementarán nos próximos días", alertou Adrian Edwards, portavoz do ACNUR.

Estes numeros totais inclúen os desprazados e refuxiados que fuxiron no que se denomina "primeira onda" de abril 2012, tras o golpe de estado de marzo do 2102, como o acumulado ata agora. "A degradación da situación sanitaria, de refuxio, saneamento, e seguridade alimentaria que puidemos observar nos últimos nove meses no norte está a agravarse conforme o número de desprazados internos increméntase", aseverou Jens Laerke, portavoz da Oficina de Coordinación de Asuntos Humanitarios de Nacións Unidas (OCHA).

En xuño de 2012, tres grupos salafistas -Ansar Al Din, Monoteísmo e Yihad en África Occidental (MYAO) e Al Qaeda no Magreb Islámico (AQMI)- fixéronse co control do norte de Mali, onde impuxeron un sistema baseado nunha estrita interpretación da sharía, a lei islámica.

RUPTURA DO ALTO AO FOGO: GUERRA ABERTA
Ansar el Din rompeu hai uns días o cesamento do fogo pactado en decembro e lanzou unha ofensiva cara ao sur, polo que o Goberno de Mali enviou a pasada semana unha petición de axuda á ONU e a Francia, que respondeu o envío de tropas e o inicio de operacións aéreas contra os salafistas.

Pola súa banda, Marixie Mercado, portavoz de Unicef alertou do "alto risco" e da "crecente preocupación" de que, na fuxida, menores de idade sexan separados dos seus pais e sexan eventualmente recrutados polas milicias armadas ou sufran abuso sexual.

Elisabeth Byrs, portavoz do PAM, confirmou que a inseguridade obrigou a desprazar persoal que traballaba en Mopti a Segou, e que nas próximas horas estes mesmos empregados serán de novo trasladados a Bamako, "aínda que é unha medida temporal", especificou.

O PAM traballa sobre o terreo con nove ONG locais para lograr distribuír a súa asistencia alimentaria. Ata a data, o organismo puido axudar a 270.000 persoas no norte do país, unha cifra que pretende ampliar a 400.000 durante 2013. En total, en 2012, logrou repartir comida a 1,2 millóns de malianos.

Segundo a Oficina de Coordinación de Asuntos Humanitarios de Nacións Unidas (OCHA), polo menos 4,2 millóns de malianos necesitarán axuda humanitaria en 2013; deles, 2 millóns necesitan asistencia alimentaria urxente, o que inclúe "centos de miles de nenos malnutridos".