A asociación Mariña Patrimonio probou ante a dirección xeral do Patrimonio a existencia dunha mina de ouro no castro focense do Carreiro. O colectivo deu conta deste xacemento xa o ano pasado, pero o organismo autonómico non o catalogou como castro senón como xacemento sen determinar, ao asegurar que non contaba con elementos defensivos nin con explotacións mineiras, algo que agora queda probado. De feito, Patrimonio xa rectificou e incluíu a documentación sobre a explotación no expediente aberto sobre O Carreiro.
O presidente da asociación, Manuel Miranda, explica que tiñan constancia da existencia de galerías nos cantiis da zona entre Llas e A Rapadoira polos veciños. «Había xente maior que nos contaba que de novos entraban nas galerías da mina, aínda que non sabían o que eran», asegura e engade que por recomendación do arqueólogo Santiago Ferrer entraron coa axuda dun grupo de espeleólogos de Mondoñedo: «Ferrer asegurounos que se era un xacemento romano sería facilmente identificable, porque tería lucernarios, unha característica que diferencia as minas romanas das medievais».
Aurelia Balseiro fala hoxe do ouro na comarca
A historiadora Aurelia Balseiro participa esta tarde, ás 20.30 horas no Cenima, nas xornadas organizadas por Mariña Patrimonio baixo o nome ‘O ouro na Mariña'. Na súa intervención falará do significado dos obxectos áureos prerromanos e sen dúbida fará referencia á enorme concentración de ouro que había na comarca. Ata os primeiros achados destas minas non se entendía a existencia de tantas pezas pero os últimos descubrimentos aclaran a incógnita.
