Un máximo de cinco quilos de peso, unhas dimensións que non superen os dous metros, un sistema eléctrico e un investimento que rolda os 5.000 euros en cada aparello. Estes son os puntos en común que ten todos os avións que participan este fin de semana en Begonte no campionato de España da modalidade F3A de acrobacia. O resto, queda a mercé da mestría das mans do piloto ao manexar o mando.
Un total de 21, chegados de distintos puntos de España, danse cita este fin de semana nas instalacións do club de aeromodelismo Os Diaños, na parroquia begontina de Pacios. Os 16 que compiten na categoría A teñen ante si un reto común, superar as catro mangas clasificatorias para conseguir unha das seis prazas da final, na que en dous voos xogaranse o podio, e tamén a clasificación para o Mundial de Suíza.
