O Concello de Lugo encargará un informe á asesoría xurídica municipal antes de tomar unha decisión con respecto ao pago da factura a Sogama, que contempla xa o incremento do 34% na tarifa pola xestión de residuos, á que se opoñen outros municipios da provincia.
En declaracións aos informadores, o alcalde de Lugo, José López Orozco, afirmou que o goberno local tomará unha decisión respecto diso en base ás recomendacións do asesor legal municipal, para abordar o asunto con toda "seguridade xurídica".
"Hoxe aínda non a recibimos. Tan axiña como recibamos a factura de Sogama, ímoslla pasar, xunto co acordo que temos asinado", precisou o alcalde, "ao asesor xurídico" municipal.
Desde o seu punto de vista, no acordo subscrito con Sogama "están asinados uns criterios", pero "a factura, presumiblemente, virá cuns criterios diferentes", dado que contemplará a anunciada subida do 34%.
López Orozco dixo que o Concello de Lugo quere "seguir o convenio que está asinado" con Sogama. "Doutro xeito, nós non podemos actuar", engadiu o rexedor, quen insistiu en calquera decisión que adopte o goberno local virá precedida da recomendación da "asesoría xurídica" municipal.
O rexedor local evitou pronunciarse sobre a decisión doutros concellos, cuxos alcaldes anunciaron que devolverán a Sogama a factura que inclúe a subida do canon.
Xogador do Folgueiro
Óscar Pérez Meitín marcou de penalti e no desconto para lograr a vitoria
21/abr./24
