Unha nova rotura nunha tubaxe da rede de saneamento ao seu paso polo campo da feira de Xunqueira provoca mal cheiro, do que se queixan veciños da asociación Valdeflores. Explican que está rota desde este fin de semana e non é a primeira vez, xa que a tubaxe está ao descuberto e na zona concéntranse novas que no transcurso dos seus botellóns sóbense encima do conduto e rómpeno, explican.
O alcalde, Melchor Roel, é coñecedor desta práctica e apunta que mandará á empresa concesionaria do servizo, Aquagest, a que proceda á reparación do tubo de inmediato. Os veciños pola súa banda afirman que «cheira unha chea» e advirten que a solución non será definitiva ata que o conduto vaia baixo terra. «A tubaxe ten que pasar por debaixo do Rego Pequeno, pero en vez de facer un vaso comunicante puxeron unha tubería de PVC por encima do río, así que os rapaces sóbense a ela e xa rompeu un montón de veces», relatan.
