Os veciños de Pousada, no municipio de Baleira, xa poden utilizar as novas leiras resultantes do proceso de concentración parcelaria iniciado no ano 2009 e que a Consellería de Medio Rural dá por teminado.
Esta reorganización de terreos afectou a 2.931 parcelas pertencentes a 177 propietarios. O proceso comezou hai dous anos e requiriu un investimento de algo máis de 600.000 euros por parte da Xunta de Galicia. Estes fondos destináronse a elaborar a documentación ambiental precisa, á creación dunha rede de camiños secundarios e ao acondicionamento de novas leiras.
O Diario Oficial de Galicia anunciou na súa edición de onte que os afectados por este trámite poden comezar a usar as novas leiras resultantes da concentración.
Reclamacións
A partir da toma de posesión, os adxudicatarios dos terreos teñen un prazo de 60 días para presentar reclamacións ante a xefatura territorial da Consellería de Medio Rural en Lugo, no caso de que existan diferenzas superiores ao dous por cento entre a cabida real das novas parcelas e a que conste no expediente de concentración.