Tres meses e medio despois da interminable folga no servizo de recollida de lixo e limpeza viaria de Lugo, o persoal de Urbaser retoma as mobilizacións. Este 13 de novembro, como farán a partir de agora todos os xoves, os traballadores concentráronse ante as instalacións que ten a filial de ACS na Avenida da Coruña para esixir que sexa readmitido o que fose presidente do comité de empresa e que cumpra o acordo que en agosto puxo fin ao paro de 59 días.
O portavoz do comité de empresa, Julio Pacios, que non descarta un endurecemento nas mobilizacións, asegurou que "non estamos dispostos a que un compañeiro pague os pratos rotos da folga de máis dun centenar de traballadores".
Ademais da readmisión deste exdelegado sindical, Julio Pacios asegurou que para alcanzar "a paz social real" no seo da concesionaria do servizo de recollida de lixo e limpeza viaria de Lugo é preciso que a firma aplique o convenio que se pactou para desconvocar a folga.
