Parece haberse perdido aquela tradición pola que a dirección dalgunha empresa decidía premiar, cada mes ou cada ano, a un dos seus empregados polo esforzo realizado. De forma similar e en aras dunha maior unidade para o colectivo, a Asociación de Comerciantes, Industriais, Servizos e Autónomos (Acisa) de Ribadeo comezou en 2011 a distinguir non só aos seus asociados, senón tamén a determinados ribadenses, para animarlles a seguir superándose no seu traballo e para que renda o seu exemplo.
Acisa celebrou o ano pasado unha primeira cea anual para fomentar a unidade dos empresarios. Non en balde, principalmente os comerciantes ribadenses seguen sendo un referente para A Mariña lucense e o Occidente de Asturias e por iso, a asociación ocúpase de potenciar e manter o seu poder de atracción.
