Os axentes da Policía Nacional e os da Autonómica colaborarán dunha forma máis activa cos da Policía Local á hora de controlar os horarios dos establecementos da Rúa Duquesa de Alba, así como os niveis de ruído tanto nos locais como na propia rúa. Os tres corpos realizarán en ocasións controis de forma conxunta para alcanzar un maior nivel de efectividade. A ese acordo chegouse onte nunha reunión da xunta de seguridade local, celebrada na casa consistorial a petición do grupo de goberno local ante a polémica xurdida nos últimos días ao redor da rúa.
A primeira tenente de alcalde, María Xosé Veiga, explicou que no encontro, ao que asistiu o subdelegado do Goberno, Ramón Carballo, repasáronse os datos sobre os incidentes nos últimos anos e meses. «O resultado é que nin Monforte é unha cidade perigosa nin a rúa da movida chama a atención por inseguridade. Os casos de Monforte son puntuais».
