Os prezos dos carburantes subiron por terceira semana consecutiva, en plena operación saída de vacacións de agosto, e situáronse nos niveis máis altos desde mediados de xuño, segundo datos do Boletín Petroleiro da Unión Europea (UE).
En concreto, a gasolina súper de 95 octanos encareceuse un 0,43% na última semana, ata 1,181 euros por litro, mentres o gasóleo fíxoo un 0,66%, ata 1,061 euros.
No caso da gasolina, é o prezo máis alto desde o 19 de xuño, en tanto que o do gasóleo supón o máximo desde o 12 de xuño.
No último mes, a gasolina subiu un 1,11% e o gasóleo, un 2,12%.
Con todo, os carburantes están máis baratos que no principio do ano, un 4,53% no caso da gasolina e un 5,86% no do gasóleo.
Pola contra, a gasolina encareceuse un 3,23% respecto da mesma data do ano pasado e o gasóleo, un 3,31%.
Os prezos están aínda moi lonxe dos máximos alcanzados en setembro de 2012, un 22,4% no caso da gasolina e un 26,57%, no do gasóleo.
Encher un depósito de 55 litros custa agora 65 euros se se consome gasolina súper e 58 euros se se opta polo gasóleo.
