A sección segunda da Audiencia Provincial da Coruña condenou este martes a cinco acusados dun secuestro no municipio de Oroso a penas de entre seis meses e seis anos e tres meses de cárcere para unha suma total de quince anos.
O fiscal chegou a un acordo cos acusados de reter a unha muller para cobrar unha débeda na localidade de Sigüeiro en 2013.
Unha muller pediu a un amigo o cobro de 2.850 euros dunha terceira persoa, a vítima, que o 24 de outubro daquel ano se atopaba na súa casa co seu marido, o seu irmán e a súa filla de nove anos e foi sorprendida por outros dous homes, ambos os dous contratados polo amigo da instigadora do secuestro.
Durante o presunto asalto houbo varias lesións e incluso se disparou unha pistola co canón apoiado na tempa da principal vítima mentres que ao final os dous autores deixaron encerrados aos que estaban na vivenda.
Por estes motivos o fiscal acordou penas por roubo con violencia, detención ilegal, lesións e receptación, pois a quinta acusada vendeu posteriormente un anel roubado nunha tenda de compravenda de ouro.
A muller que motivou os feitos foi condenada a dous anos como inductora do roubo e o seu amigo a outros dous, neste caso como cooperador necesario, ambos coa atenuante de reparación do dano e no segundo caso co engadido de drogadicción.
Os dous asaltantes foron condenados polo roubo a dous anos e tres meses e pola detención ilegal a outros dous anos, un coas atenuantes de reparación do dano e drogadicción e o outro coa circunstancia eximente incompleta de alteración psíquica e drogadicción.
A este último, o autor do disparo na tempa polo que inicialmente se pedían doce anos por intento de asasinato, caéronlle outros dous anos como autor dun delito de lesións, polo que cumprirá un total de seis anos e tres meses.
A última das acusadas, vinculada á receptación, ten o factor atenuante de reparación do dano, polo que a condena quedou en seis meses.
