Localizan a unha muller, que deu positivo en cocaína, tras atropelar a un home en Oroso e fuxir

A Garda Civil identificou a unha veciña da Coruña de 49 anos, que carecía de permiso de conducir e que deu positivo en cocaína, como a presunta autora do atropelo dun home de 33 anos no municipio coruñés de Oroso.

Segundo informou este sábado o instituto armado, os feitos ocorreron ás 16.05 horas do venres no quilómetro 49 da N-550. En concreto, a muller deuse á fuga tras atropelar ao home logo de adiantar pola esquerda a un vehículo que estaba parado para deixar cruzar á vítima.

A Garda Civil sinalou que, nun primeiro momento, a condutora, que manexaba un Dacia Sandero, apeouse do vehículo para interesarse polo estado do atropelado pero, rapidamente, volveuse a montar no turismo para abandonar o lugar o accidente.

Unha vez recibida a denuncia, os axentes iniciaron un dispositivo para localizar á muller, que deu con esta ás 18.30 horas na cidade herculina. Alí, a Garda Civil comprobou que a presunta autora carecía de permiso de conducir.

 Ademais, a muller deu positivo en cocaína e opiáceos. As probas de alcoholemia foron negativas. Por todo iso, os axentes confeccionaron o correspondente informe para remitilo ao Xulgado en funcións de Garda de Santiago.