As imaxes dos veciños, moitas anónimas, resultaron clave para chegar ás detencións

As gravacións que os veciños realizaron o pasado día 30 durante a liorta que enfrontou ultras do Atleti e do Dépor foron clave para identificar e deter as 34 persoas que supostamente participaron de forma máis directa na pelexa, sinalaron a Efe fontes da investigación.

Numerosas foron as imaxes que os axentes tiveron que visionar e que foron proporcionadas, moitas delas de forma anónima, por veciños da zona de Madrid Río onde se produciu a liorta, nas proximidades do estadio Vicente Calderón.

Desde as recollidas con teléfonos móbiles ata as gravadas con cámaras de vídeo e, xa que logo, de maior calidade, numerosas imaxes pasaron polos ollos dos investigadores, nun arduo labor porque nalgúns casos a resolución era baixa.

As imaxes contrastáronse con outras dispoñibles dos ultras da Frente Atlético nalgúns partidos de fútbol.

Grazas a ese contraste, ás identificacións que puideron facer os axentes da Unidade de Intervención Policial (UIP) e, incluso, ás declaracións dos propios ultras, púidose determinar a implicación máis directa deses 34 detidos, todos eles da Frente Atlético e que se enfrontaron aos Riazor Blues do Deportivo da Coruña.

Entre os detidos figuran, segundo as fontes, dúas dos supostos autores materiais -un deles taxista- da morte do incha coruñés Francisco Javier Romero, alias Jimmy, que sufriu un traumatismo cranioencefálico con hemorraxia e o estalido do bazo por un golpe provocado por unha barra de ferro.

Ademais, entre os arrestados hai polo menos tres menores de idade, e á maioría deles impútaselles un delito de rifa tumultuaria.

As detencións das 34 persoas practicáronse nas localidades madrileñas de Parla, Alcobendas, Fuenlabrada, Leganés, Móstoles, San Sebastián de los Reyes e a capital, así como nos municipios toledanos de Seseña e Talavera de la Reina, en Ávila e en Cuenca.