A plataforma de vítimas do accidente do tren Alvia, que tivo lugar en Angrois en xullo de 2013, critica que o xefe de seguridade de Renfe, Antonio Lanchares, "mentiu" durante a súa intervención este martes ante o xuíz que instrúe unha causa con 80 mortes e 144 feridos.
En declaracións a Europa Press, o portavoz da asociación, Jesús Domínguez, censura que, segundo fontes presentes na declaración, o cargo da operadora ferroviaria investigado "dixese que se volvía a Asfa" ao desconectar o sistema de control de velocidades 'ERTMS', algo que el solicitou e que autorizou o seu homólogo en Adif, tamén investigado. "É falso. Nunca foi con 'Asfa' ese tren", asevera Domínguez.
"E non é que o digamos nós, dio o informe independente de Mariñas", asevera, en relación á primeira peritaxe do experto César Mariñas.
Ademais, reproba que se trataba "encima" dun 'Asfa' "mal configurado", o da liña Ourense-Santiago, posto que "se non hai baliza programada, non serve de nada". Alude con isto á baliza que Adif instalou tres días despois do accidente.
A maiores, recorda que varios peritos coinciden en que a desconexión do ERTMS supuxo unha degradación da seguridade e un incremento do risco de accidente. Engade que a directiva europea "obrigáballe a avaliar cada cambio", polo que, incide, a decisión de desconectar ese sistema "debería ir acompañada" dunha análise.
O director de Seguridade na Circulación de Renfe, Antonio Lanchares, declarou durante hora e media como investigado na causa aberta polo accidente ferroviario de Angrois.
Lanchares, que non atendeu as preguntas dos xornalistas, saíu das dependencias xudiciais protexido por escoltas e perseguido polos membros da plataforma de vítimas do accidente, que foron tras os seus pasos increpándoo e proferindo insultos contra a súa persoa.
Estes mesmos manifestantes leron, minutos antes, un comunicado no que piden que presente a súa dimisión "de xeito irrevogable" como responsable da desconexión do sistema de freado ERTMS, que podería evitar o sinistro.
