Láncara pide a mediación de Cuba para conseguir a casa familiar dos Castro

O Concello lancarés solicitará ao consulado de Cuba que realice xestións para conseguir a cesión ou venda da casa do pai de Fidel Castro, Ángel Castro Argiz, a cal pertence a varios propietarios, co obxectivo de convertela nun museo. O encontro celebrarase este martes en Santiago de Compostela.

A vivenda, situada en San Pedro de Láncara, atópase deshabitada desde fai máis de cincuenta anos, polo que está deteriorada. A casa foi visitada polos propios Fidel e Raúl Castro e tamén recibe a diplomáticos cubanos, familiares do Castro e outras persoas. Ademais, o pasado mes de novembro foi escenario da homenaxe ao líder cubano con motivo do seu falecemento.

Coa reunión deste martes retomaranse os contactos para tratar a cesión ou venda da casa, os cales estiveron paralizados pola morte de Fidel Castro, apuntou o alcalde, Darío Piñeiro. Neste encontro tamén se abordará a entrega a Raúl Castro do título de Fillo Adoptivo do municipio, distinción coa que xa contaba Fidel desde 1992. A corporación aprobou por unanimidade nun pleno o pasado xullo a concesión deste recoñecemento baseándose nos lazos familiares do Castro con Láncara e o irmandamento deste concello coa illa cubana da Lisa. O Concello invitará o mandatario a viaxar a Láncara para recibir a distinción e, se non pode asistir, baralla unha viaxe institucional para facerlle entrega do título.

Segundo sinalou o rexedor, outro dos temas que se tratarán na reunión no consulado é o mantemento de relacións comerciais con Cuba. Para iso, o pasado mes de setembro o municipio lancarés albergou un encontro de empresarios lucenses cunha delegación do goberno do país caribeño, ao que tamén asistiron membros da Deputación e o Concello. Naquela cita abordouse a participación de varias firmas nunha feira gastronómica en Cuba.

Estúdase organizar outra visita, xa que empresarios de Galicia e de fóra da comunidade mostráronse interesados, afirmou.