A alta representante da Unión Europea (UE) para a Política Exterior, Federica Mogherini, pediu este venres "moderación e respecto ás institucións democráticas" en Turquía, a través da rede social Twitter.
Mogherini afirmou nesa breve mensaxe estar "en contacto constate coa delegación da UE en Ankara e Bruxelas" desde Mongolia, onde se atopa participando no cume do foro UE-Asia en Ulán Bator.
"Pido moderación e respecto ás institucións democráticas", insistiu a alta representante comunitaria.
O presidente turco, o islamita Recep Tayyip Erdogan, fixo este venres un chamamento ao pobo turco a resistir o golpe de estado, perpetrado na súa opinión por un pequeno grupo de militares.
Mentres, o exército turco cualificou a Erdogan como un "traidor", acusouno de establecer un "réxime autoritario do medo", á vez que declarou un toque de queda para todo o país e a lei marcial.
