A Unión Europea (UE) activou o mecanismo comunitario de protección civil para proporcionar axuda a Portugal no incendio declarado no centro do país, que causou máis de 50 vítimas mortais e 59 feridos, e que permitirá o envío de avións antiincendios.
"Nunha resposta inmediata á petición de asistencia por parte das autoridades portuguesas, o mecanismo europeo de protección civil foi activado para proporcionar salvamento contra incendios", afirmou o comisario de Axuda Humanitaria e Xestión de Crise, Christos Stylianides.
Francia ofreceu tres avións que "serán rapidamente enviados para asistir os esforzos de urxencia locais. España mandou un avión de xeito bilateral", precisou o comisario.
Stylianides expresou as condolencias de Bruxelas aos familiares das vítimas e reiterou que "a UE está completamente preparada para axudar". "Farase todo para asistir ás autoridades e á xente de Portugal neste momento de necesidade", asegurou.
A UE enviou ademais un oficial a Portugal para coordinar a axuda e ulteriores peticións das autoridades nacionais a Bruxelas, que co seu sistema de resposta coordinada ante urxencias proporciona axuda na xestión de desastres naturais en contacto coas autoridades de protección civil nacionais.