A COSTA LUCENSE é un bo destino turístico e, ademais, barato. Segundo un informe elaborado pola taxadora Tecnicasa, o municipio de Barreiros sería o cuarto máis barato con respecto aos prezos ofrecidos para o aluguer durante o mes de agosto, sendo 13,33 euros por metro cadrado e mes a media do municipio. Estaría tan só precedido do barrio coruñés da Agra do Orzán (8,25), Oliva (Valencia) con 11,11 e Torrevieja (Alacante) con 12,68 euros o metro cadrado.
As inmobiliarias barreirenses confirman estes prezos e afirman que «a caída de prezos está a ser grande este verán». Sosteñen que o abaratamernto, no que respecta a Barreiros e á Costa de Lugo, andou arredor do 20 por cento. «Ademais, agora as estancias son menores; en vez de estar un mes enteiro botan a metade ou menos», apunta un dos vendedores.
En Barreiros, a demanda segue a concentrarse en familias con fillos e interésanse tanto en casas como en pisos. «As parellas sen fillos normalmente buscan máis unhas vacacións de hotel».
