Os traballadores da concesionaria do servizo de limpeza e recollida de lixo en Lugo, en folga desde hai vinte e oito días, denunciaron hoxe que o persoal da empresa Tragsa está a realizar labores de limpeza e recollendo desperdicios en puntos onde non fora decretada a alerta sanitaria.
O secretario do comité de empresa, Julio Pacio, explicou a EFE que as brigadas formadas con persoal alleo á concesión por parte de Urbaser non recolleron lixo nin o sábado nin o domingo na cidade, pero o persoal de Tragsa si traballou, "con camións procedentes doutros municipios".
Segundo Pacio, o persoal de Tragsa xa non se limita unicamente aos puntos nos que foi decretada a alerta sanitaria por parte da Xunta de Galicia e "alí onde ven un pouco de acumulación, recollen o lixo", polo que está "a vulnerar o dereito de folga".
De feito, subliñou que é o propio persoal de Urbaser o que está a levantar o lixo nos puntos nos que se decreta a alerta sanitaria. Por outra banda, o secretario do comité afirmou que hai persoal da empresa pública que incluso "está a varrer rúas" da cidade.
"A imaxe que se vende é outra, pero a realidade é a que é", lamentou Julio Pacio, quen tamén confirmou que durante todo o fin de semana non houbo ningún achegamento por parte da empresa concesionaria para retomar as negociacións.
Xogador do Folgueiro
Óscar Pérez Meitín marcou de penalti e no desconto para lograr a vitoria
21/abr./24
