A reforma do paseo do Malecón de Sarria, obra incluída na primeira fase do plan de encanamento do río, estará finalizada en Semana Santa a falta do mobiliario urbano e da colocación da nova varanda, segundo asegurou onte a Confederación Hidrográfica do Miño-Sil (CHMS).
O organismo de conca sostivo que se cumprirán os prazos previstos para a remodelación, que conta cun orzamento duns 500.000 euros e que leva a substitución do pavimento e das canalizacións, ademais de nova iluminación e mobiliario.
Os traballos comezaron a finais de novembro, con máis dun mes de atraso sobre a programación inicial e, pouco despois, sufriron un parón pola tramitación do proxecto para soterrar o cableado, actuación que finalmente quedou posposta para máis adiante. Os hostaleiros desta céntrica zona de Sarria mostraron entón a súa preocupación, ao temer que a obra non estivese rematada para Semana Santa, o que lles ocasionaría prexuízos económicos por coincidir co inicio da tempada forte de peregrinos e a instalación de terrazas.
Estes días, a empresa adxudicataria ocúpase do hormigonado. O paseo terá un acabado en cemento puído e queda pendente colocar de novo a varanda que deseñou Díaz Fontes, pero cunha banda acristalada como protección fronte a inundacións.
