As bóvedas da igrexa do convento da Mercé de Sarria recuperaron todo o seu esplendor ao finalizar a restauración do templo, que a partir da próxima semana poderá recuperar o culto.
As obras, financiadas pola Consellería de Cultura, supuxeron a recuperación das bóvedas, que datan do século XIX. Foi necesario eliminar o revestimento de cal, consolidar as capas das bóvedas de barrotillo e morteiro de cal e pintalas. A intervención tamén afectou os arcos, que foron limpados, explicou a comunidade mercedaria.
A mellora da rede eléctrica, próximo proxecto
A comunidade mercedaria estuda a realización de novas obras na igrexa do convento. Segundo explicou, as máis necesarias son o pintado de parte das paredes e a reforma da instalación eléctrica e da iluminación, traballos, para os que busca a colaboración das administracións públicas.
