O director da Fundación Alimerka, Antonio Blanco, e a concelleira de servizos sociais de Ribadeo, Teresa González, explicaron o traballo que realizan xuntas ambas as entidades e que lles leva a atender a 130 persoas no municipio ribadense, ás que achegan axudas en forma de alimentos e produtos de primeira necesidade a través de Cruz Vermella e os propios servizos municipais.
Teresa González mostrouse preocupada polo aumento da pobreza en Ribadeo: «Sinto unha enorme inquedanza a raíz dos últimos datos que se deron a coñecer en torno á pobreza infantil. Como responsable municipal, podo afirmar que nos últimos anos os rostros foron cambiando. Antes atendíase a poboación inmigrante e agora temos que ver día a día caras de veciños que ao mellor nunca se lles pasaría pola cabeza acudir a nós».