A vila focense ultima xa os preparativos para a Festa do Berberecho que se celebrará este sábado, e na que se repartirán uns 2.500 quilos deste bivalvo, segundo as previsións de José Carlos Paleo, presidente da asociación de comerciantes local.
Na tarde de onte comezaba a montaxe da carpa no porto, onde se poderá degustar, ao prezo de tres euros, racións de berberechos ao vapor, á mariñeira, en empanada e paella, unhas variedades que preparará a empresa Palacio de Cristal, á fronte da cal estará o hostaleiro David Rivas. As racións poderanse degustar tanto pola mañá como pola tarde e os comensais gozarán de música e bailes en directo, a cargo das agrupacións folclóricas A Subela e O Feitizo e a rondalla Latexos.
