A feira de oportunidades (outlet) que pechou as súas portas onte na praza de abastos de Monforte recuperou o tirón dos mercados temáticos que desde fai máis de ano e medio organízanse neste espazo.
As feiras sectoriais puxéronse en marcha en canto a praza foi reformada. O primeiro ano de vida funcionaron moi ben pero as últimas convocatorias foran máis frouxas, baixara a afluencia de vendedores e tamén de compradores. Con todo este fin de semana o Concello programou unha feira de oportunidades centrada no sector téxtil e do calzado na que só participaron firmas de Monforte. Acudiron 14 establecementos que montaron 18 postos (algúns dobres) con descontos do 50 ao 70 por cento nos seus artigos e onte pouco antes das dúas da tarde, cando se pechou o mercado, todos mostráronse satisfeitos coa participación dos consumidores e coas vendas.
